馬後砲

昨晚睇完美國公佈既就業數據訓覺，今朝早起身睇電視同報紙新聞， 發覺金價，美元匯價走勢完全同小小力預計相反，就業數據（非農業職位）被演譯為反映美國經濟表現強勁，帶動美元回升，金價下 跌。奇！
報紙話經濟師原先預計非農業職位增加110000 份， 依 家132000份係好 過預期。但據小小力理解，110000份係預期下限，正常預期應該係150000份，上限預期200000 份。咁，132000份只係好過預期下限，何來反映美國經濟表現強勁？再睇深入Ｄ，十月非農業職位增加79000份， 咁十一月增加132000份係唔係好好？當然唔係，睇番是次非農業職位增加，主要集中於零售業，因為十一月係感恩節，係美國消費最高峰，因此零售業雇用左好多臨時工，令非農業職位迅速增加，但對 整體就業率係冇幫助（因為臨時工唔當係就業，你一年得一個月有 野做政府都當你失業），再睇失業率，由五年半低位4.4﹪再 升0.1﹪到4.5﹪，而且平均時薪亦進一步下跌，證明經濟表現一Ｄ都唔強 勁，再加上美國密西根大學12月消費者信心指數初值為90.2，低於11月終值92.1。小小力一Ｄ都睇唔到強勁。
咁，點解釋美元回升，金價下跌？小小力認為係累積左一段時間既獲利回吐！
不過，投資總係充滿著無奈! 好多人睇係馬後砲，為解釋而解釋！投資最好都係信自己，自己為自己既投資負責。