大地震

本地股市跟隨外圍股市下跌，恆生指數單日跌564點。咁講，升得快便跌得快，係好正常。並唔係咩股災，只係配合期指結算(每月最後一個交易日前兩日!!) 同認股證活動所作出既調整吧了。

大戶要推底大市，通常會大手沽中移動(941)。咁可以解釋點解中移動(941)冇乜前景都會大升，因為平日大戶要儲足夠彈藥!! 在求過於供(大戶唔只一個)既情況下股價自然被抽高。又問咁高價買大戶唔怕輸錢咩? 當然唔怕，沽期指既利潤何只十倍呀??

所以，小小力對中移動(941) 都係避之則吉。

註：
1.基金暫時沒有股票在手。
2.小小力唔係金融業案內人(insider)，因此並冇內幕消息。
3.基金價格可升可跌，投資者應注意有關風險。

貨幣升貶值

貨幣貶值理論上係相對的，則有一隻貨幣貶值，就有另外一隻(或者多隻)貨幣升值。

遇上貨幣升值，其實唔應該抉擇銀行股，因為銀行冇實質資產，有錢都用黎放數賺息差或者去收購啦!! 貨幣升或貶值對銀行影響都唔大。小小力建議抉擇有實質資產而且折舊率低既項目，例如地產股!! 如近期人民幣升值，可以留意內地地產股。

貨幣貶值，影響左一個國家既購買力，亦影響左外資對該國家既公司資產既興趣。如近期美元貶值，削弱左美國在石油市場既購買力，亦影響左外資對美國公司資產既興趣，因此美股下跌。短其解決辦法係加息或者減少貨幣供應(發債)。咁，美國加息週期又點會開始呢? 小小力建議投資黃金。

山東招金礦業

抽新股，山東招金礦業 (1818) ，用黃表申請左10000股，用左大約120,000蚊。因為今次銀行不設孖展。所以為有用真金白銀。選擇山東招金礦業 (1818) 既理由係石油價格穩定，美元貶值，短期對金價有支持。

山東招金礦業（1818）招股文件中披露，擬按每股9.8元至12.68元招股，發售1.728億股股份，九成作國際配售，餘下一成則作公開發售，股份將於今日（24日）進行公開招股，下周三（29日）中午截止，每手500股，計劃於十二月八日上市。若以中間價11.24元計算，將集資18.2億元。是次計劃集資所得，其中4億至6億元用作改善採礦技術，2億至3億元作擴充產能，4億至6億元收購其他金礦，1億至2億元作技術改善，2億至3億元用作收購其他項目，4億元用作償還貸款，另外不多於一成則作營運資金。

郁手

11月22日，購入匯豐新興市場股票動力基金 1126.939單位，手續費2%。購入格10.8779美元。時1美元兌7.79港元

本金：200,000.0000
減：基金手續費：1948.8753
淨資產：198,051.1247

流動資產
匯豐新興市場股票動力基金：95,495.5047
現金：102,555.6200
淨資產：198,051.1247

石油，黃金，糖

小小力個人相信，石油與黃金的簡單關係，係當美元價格貶值的時候，賣石油的資金會轉向黃金市場。因此，石油價格升，黃金價格也升。至於糖價，在石油價格升至較高水平的時候(例如六十美元一桶之上)，由糖提煉出的酒精(醇) 會係一種能源代替品(substitute) ，亦因此引發糖價上升。

結論：
石油唔升唔洗買黃金同糖。
美元資產唔貶值唔洗買黃金。
石油唔升到不合理水平唔洗買糖。
小小力暫時唔睇西王糖業(2088) ，但會抽山東招金礦業的IPO(Initial Public Offer) 。

註：
1.基金暫時沒有股票在手。
2.小小力唔係金融業案內人(insider)，因此並冇內幕消息。
3.基金價格可升可跌，投資者應注意有關風險。

熊出沒注意

恆生指數星期一(十一月二十日) 跟隨外圍股市(亞洲區) 下跌，跌幅228點，成交490億。今日報紙標題「熊出沒注意」，指股市即將出現熊市(跌市) ，會有10%跌幅(大約1800跌) 。
小小力講過，你要跳得更高，第一步係先要將個人座底再彈起。
今次下跌個人相信唔係(或者未係)熊出沒既時候，調整反而係登上下一個高峰既準備動作。下一個目標應該係恆生指數19900點，當目標出現既時候，就係熊出沒注意之時。
展望2007年，相信係只宜短線投資。因為難於尋找入市位(個人相信股市不斷尋底)，作長線投資比較困難決定。

註：
1.基金暫時沒有股票在手。
2.小小力唔係金融業案內人(insider)，因此並冇內幕消息。
3.基金價格可升可跌，投資者應注意有關風險。

增加本金

小小力再注資，壞孩子基金本金增加一倍到二十萬港元。紐約油價剛剛跌穿55美元，內地銀行股回吐，交通銀行跌超過2%!!
下星期應該可以開始行動。

本金: HK$200,000

註：
1.基金暫時沒有股票在手。
2.小小力唔係金融業案內人(insider)，因此並冇內幕消息。
3.基金價格可升可跌，投資者應注意有關風險。

EBITDA

EBITDA(Earning Before Interest, Tax, Depreciation, Amortisation) 代表未計所得稅、折舊及攤銷費用、物業、廠房及設備重估減值既收益。以往，一般公司公佈業績，都只會公佈盈利(Earning) 同稅前盈利(EBIT,Earning Before Interest and Tax)，咁點解依家又有D咁既野??
其實主要係針對折舊(Depreciation) ，物業、廠房折舊慢同折舊率比較細，show唔show比你睇都影響不大，但對一D叫做高科技公司如無線電話網絡供應商、寬頻供應商，佢地既設備折舊率係超高(如高科技電腦一年後可能已經唔update，唔值錢，又如新車一落地就唔見咁一半) 。為左盤數好睇，於是整出個EBITDA。呢D公司EBITDA可能好好，但計埋折舊可能係冇盈利!!
要知道當完全折舊，設備就要更換，咁都係成本(cost) 既一部份，點解抽起唔睇?? 我睇呢D公司盤數就數抽起EBITDA唔睇，你呢??

註：
1.基金暫時沒有股票在手。
2.小小力唔係金融業案內人(insider)，因此並冇內幕消息。
3.基金價格可升可跌，投資者應注意有關風險。

成也英超，敗也英超

有線電視/有線(1097) 寬頻在新一輪英格蘭超級足球聯賽(簡稱英超聯) 本地轉播權爭奪戰中喪失英超聯轉播權。電盈(0008)旗下ｎｏｗ寬頻電視以市傳高達最少15.6億元奪得2007-2008年起連繼三年獨家轉播權 - 包括電視，網上，3G電話。事件上，我睇唔到成也英超，只見敗也英超。

有線(1097)方面，基本上係單天保至尊既局面。所有客戶及廣告業都只係對其體育節目有興，當中大部份集中於睇英超聯。喪失英超聯轉播權，相信有線電視已經接近玩完。什麼發展多元化既節目只係廢話。因為發展多元化既節目已經係多年黎發展既方向，但從來未見成果，今時今日亦唔相信有咩大突破。始終太過集中於單一項目都係死路一條。

電盈(0008)旗下ｎｏｗ寬頻電視，就係以一個天價行番以前有線條舊路，咁o米又係死路一條。

市民方面，大家繼續從不同途徑非法睇英超聯。馬會方面投注額可能輕微減少。壟斷(Monopoly)下，犧牲既係大眾利益(Social Welfare)。贏家只有一個，賣轉播權o個個!!

註：
1.基金暫時沒有股票在手。
2.小小力唔係金融業案內人(insider)，因此並冇內幕消息。
3.基金價格可升可跌，投資者應注意有關風險。

大方向

當股票升(話因為經濟復甦)，債券升(話進入減息週期) ，樣樣都話升既時候，係追入去跟風，定係尋找一些另外既機會呢?? 小小力放出手上基金(環球高增長股票同垃圾債券基金，放出時回報率接近50%)時，同銀行經理傾過，佢話大市將進入減息週期(小小力係唔認同既) ，未來幾年銀行既目標都係發展垃圾債券。你又點睇呢?

小小力認為，未進入減息週期，息口維持不變，債券唔會有大上落!!
就算進入減息週期，減息會令債券價格上升，咁，唔應該係買債券基金既時候，相反應該係賣債券基金既時候!!

o係呢個樣樣都話升既時候，商品(如石油，金，銅，糖，麥等等)價格正在回落中，短線可以考慮D要消耗商品既股票如航空股，德昌電機(0179) 。長線可以考慮低吸一D商品有關投資項目。

匯豐新興動力股票基金，主要投資金磚四國商品股票市場，積極留意中。

註：
1.基金暫時沒有股票在手。
2.小小力唔係金融業案內人(insider)，因此並冇內幕消息。
3.基金價格可升可跌，投資者應注意有關風險。

未平倉合約

未平倉合約 (Open Interest)

期指係一種你同莊家對賭既「零和遊戲」，你贏既就係莊家輸既，反之亦然。
大戶於期指市場（和期權市場）內的部署和舉動，很多時候都能為現貨市場的後市帶來啟示。除了價位、成交量和時間外，未平倉合約數量的變化亦為一項重要的參考指標。未平倉數據啟示後市走向期指市場內進行的是零和遊戲，勝利者的總盈利和失敗者的總虧損相等。每一張好倉的交易對手必然曾沽空了一張合約，每個月份合約的未平倉合約數目顯示好友持倉過市的總數量，亦同時顯示淡友持倉過市的總數量。未平倉合約數量愈高，好淡雙方的爭持會愈激烈，市況的波動程度亦會愈大。大戶累積大量好倉／淡倉的目的，必然是於高位／低位平倉。故若配合價位和未平倉合約數量的相互變化來分析，不難洞悉先機，提高對後市走向預測的準繩度。

(1)指數趨勢上漲中
(1.1)未平倉合約增加，指數持續上升，未平倉量持續上揚，表示認同上漲趨勢的人愈來愈多，後市上升的機率較大。 大升市中多有此種現象。
(1.2)未平倉合約持平，指數的上升，未平倉量維持原來水準，表示向下不受認同，未來指數上漲的空間亦有限。趨勢仍以升為主。
(1.3)未平倉合約減少，指數的上升，愈來愈多的投資者離場。這多半是獲利與認輸所造成。 價量背離，指數上漲空間有限，甚至有可能逆轉。

(2)指數趨勢橫行中
(2.1)未平倉合約增加，指數整固中，指數沒有明確動向，但未平倉持續增加，一旦突破，會出現單邊市。 在某一價位上，未平倉量顯著增加，若指數無法突破該位或是突破不久後隨即回落，表示該價位是壓力區，指數未來大跌機率較高。在某一價位下，未平倉量顯著增加，且指數不易跌破該位或是跌破不久後隨即回升，表示該價位是支撐區，指數未來大漲機率較高。
(2.2)未平倉合約持平，無方向。
(2.3)未平倉合約減少，投資者平倉離場，指數可能持續整固，靜觀其變。若是月尾轉倉導致，較不具參考性。

(3)指數趨勢下跌中
(3.1)未平倉合約增加，未平倉量增加，跌勢被確認，大市將進一步向下。大跌格局中，多半有此現象。
(3.2)未平倉合約持平，未來仍以跌勢為主。下跌趨勢未受到大多數的投資者認同，沽壓不大。
(3.3)未平倉合約減少，與跌勢背馳，留意底部出現。指數逆轉向上的機率增加。

未平倉合約
11月13日 - 135,282張
11月10日 - 133,749張
11月9日 - 136,602張
11月8日 - 131,353張
11月7日 - 134,473張
出現(1.2)的情況 - 未平倉合約持平，指數的上升，未平倉量維持原來水準，表示向下不受認同，未來指數上漲的空間亦有限。趨勢仍以升為主。
睇下係唔係?

勞氏環保

相信唔洗點講你都知勞氏環保(309) 係做D乜，佢地係香港最具規模既清潔公司之一。公司目前主要負責商場和商業大廈既清潔工作。現在公司係虧損中，但買股票係睇將來，咁佢地又有冇將來呢?
清潔公司主要接商場和商業大廈既清潔合約，但係香港既競爭環境咁劇烈，清潔合約既價錢不斷向下調整，根本上冇乜利潤空間。公司唯有減低成本，一方面要做大，用economic of scale去降低marginal cost。另一方面減低主要支出 - 人工 (所以工資調查佢地通常都係最低o個幾間公司之一)。但仍公司舊虧損中，因此股價一直低迷。
但如果佢地能夠靠股市高位成功集資減債，能夠接到政府醫院清理醫療費料合約，能夠接到內地大商業城市清潔合約，咁股價會唔會十級而上呢?
11月9日，勞氏環保單日升幅45.16%!!可以留意….

註：
1.基金暫時沒有股票在手。
2.小小力唔係金融業案內人(insider)，因此並冇內幕消息。

簡單法則

止蝕：買入價向下調整１０﹪
出貨：高位回落１０﹪

風高浪急

十一月，本地股市風高浪急。大部份有經驗和學問的投資者都認為股市將會回落之際，本地股市卻節節上升，而且一浪高於一浪，令人難以至信。當中尤以人民幣升值概念帶動的國企股升勢最急 。在這種情況下，一眾淡友（對股市看跌，在這種情況下通常為 有經驗和學問的投資者，因為學術數據顯示股市將出現調整）均錄得虧損。一眾好友（通常為跟風的大眾）則全數獲利。
正當一眾淡友被好友恥笑為無知的時候，原來在場外只看不買的群眾最終亦按耐不住而入市，全民皆股的情況出現（現象的特徵為一般平日沒有投資股市的人都開始周圍問人買什麼「霖把」﹣ 股票編號，令人感覺似買「六合彩」；及股市成交量突然大升），亦將是機構投資者（通常稱為「大行」）高位出貨的時候。「大行」出貨動作之快，通常令一眾好友難以離場。

好友和淡友的差別：
當好友獲利的時候，恥笑淡友無知，淡友則一笑置之。
當淡友獲利的時候，淡友不會恥笑，首先他們原來就無知。而最重要的是那時好友可能已經消失，而且永遠消失。

是非成敗轉頭空，何必恥笑他人？

緊記：要致富，不是在順景的時候計算獲利多少，而是在逆景的時候計算剩下多少。

註：基金暫時沒有股票在手。

序幕

創辦目的
壞孩子基金的創辦目的，是希望通過這裡分享壞孩子基金CEO小小力在投資路上所學到的知識和經驗，與及對世界和本地(香港)經濟的見解。最終，壞孩子基金會吸收各方意見後正式投入真正投資市場，以每年100%回報率為目標，為壞孩子的未來提供一個財政自由的環境，實現壞孩子的夢想。

命名
壞孩子，來源自基金CEO小小力。一般人以為小小力是一個好孩子，事實上卻是壞到頂點的壞孩子，只是 -- 壞，沒有必要表面化。
稱為基金而非公司，因為我們更著重分散風險(Risk Diversification)。

財務資料
最初本金，港元十萬元。
財務年度，每年一月一日至十二月三十一日。
業績佈告，每年六月三十日及十二月三十一日。